Tuesday, June 05, 2007

குருத்தோலைப் பெட்டி செஞ்சி...காதலன் படத் தாலாட்டு!

இதை வைத்துக் கொண்டு குழந்தைக்கும் விளையாட்டு காட்டலாம். காதலியையும் அசர வைக்கலாம். அதை எல்லாம் அனுபவஸ்தர்கள் அறிவார்கள்!
எப்பிடிப்பா? எப்பிடிப்பா??
அட, சும்மா நம்ம குருத்தோலையை வச்சிக்கினு தாம்பா!
போ....போயி குருத்தோலை உரிச்சிக்கினு வா...செஞ்சி காட்டறேன்!

அடப் பாவி...மாதா பிதா குரு தெய்வம்!
அப்பேர்பட்ட "குரு" தோலைப் போயி உரிச்சிக்கினு வரச் சொல்லுறியே! - இது உனக்கே அநியாயமாத் தெரியல?

டேய், குருத்தோலைன்னு பனை மர ஓலையை உரிக்கச் சொன்னாக்கா...நீ ரொம்பத் தான் ஷோக்கு காட்டறியா! இன்னா விஷயம்?
சரி..சரி...இந்தக் குழந்தை ரொம்ப அழுவுது பாரு! இந்த ஓலையை நறுக்கி ஒரு குச்சிக் காத்தாடி செய்யி....வைச்சு விளையாட்டுக் காட்டலாம்!

ஊருக்குப் போயிருந்த போது, நண்பரின் நாலு வயது மகனுக்குப் போக்கு காட்டிக் கொண்டு இருந்தேன்!
கிராமத்தில் கொஞ்ச நாளாச்சும் இருந்தவர்க்கு, இந்தக் குருத்தோலை அப்படி ஒரு பழக்கம். அத வைச்சி பல பொருட்கள் செய்யலாம்! பெட்டி, விசிறி, தோரணம், குடிக்கும் ஏணம் (கப்), குடை, குச்சிக் காத்தாடி... இன்னும் நிறைய.

குருத்தோலையைத் தான் தோரணம்-னு மாவிலையோடு கட்டுகிறோம், பண்டிகை நாட்களில்!
குருத்தோலை ஞாயிறுன்னு பள்ளியில் கொண்டாடிய நினைவுகள்!
எல்லாரும் குருத்தோலை பிடித்துக் கொண்டு பின்னே வர, அவர்களுக்கு முன்னே நான் ஃபாதர் கேட்டுக் கொண்டதற்கு இணங்க,
"ஓசானா பாடுவோம்", ன்னு பாடிக்கொண்டே சென்ற ஞாபகம்! ஆனா முடிக்கும் போது, கள்ளத்தனமா...சன்னமா...ஓம் முருகா-ன்னு சொல்லி, டப்புன்னு முடிச்சிடுவேன்! :-)



ரொம்ப நாள் கழிச்சு, இந்தப் பிள்ளைத் தமிழ் பதிவு பக்கம் எட்டிப் பார்க்கிறேன்! இப்பல்லாம், ஆபீசில் ஆணி புடிங்கிட்டு, மீதி இருக்குற நேரத்தில...
தமிழைப் பார்ப்பதா, இல்லை பிள்ளைத்தமிழைப் பார்ப்பதா - நீங்களே சொல்லுங்க!

ஒரு அருமையான நாட்டுப்புறப் பாட்டு - தாலாட்டு பாட்டு கிடைத்தது.
அதுவும் பிள்ளைத் தமிழ் தானே! நாட்டுப்புறப் பிள்ளைத் தமிழ்!

காதலன் திரைப்படத்தில்,
இதன் முதல் சில வரிகளைப் பிரபுதேவா பாடுற மாதிரி ஒரு காட்சி! இனிமையான தாலாட்டு வரிகள்!
(அவரு யாரைத் தாலாட்டுகிறார்-ன்னு விவகாரமான கேள்வி எல்லாம் கேக்கக் கூடாது சொல்லிப்புட்டேன்...சரீய்ய்ய்ய் யாருப்பா அது? நம்ம சோதிகா அக்கா தானே! :-)

கொல்லை யிலே தென்னை வச்சி, குருத்தோலைப் பெட்டி செஞ்சி
சீனி போட்டுத் நீ திங்க, செல்லமாய்ப் பிறந்தவளோ!
மரக்கிளையில் தொட்டில் கட்ட, மாமனவன் மெட்டு கட்ட
அரண்மனைய விட்டு வந்த, அல்லி ராணி கண்ணுறங்கு...


ஒலிச்சுட்டி இதோ

ஆனா, இது ஒரு முழு நீள நாட்டுப் பாடல்! அருமையான தாலாட்டு!
வீல் வீல் என்று அழும் குழந்தைகளுக்கு, மருந்து ஊத்தித் தூங்க வைக்கும் கலி காலம் இது!
டாக்டர் தேவைப்பட்டா கொடுக்கச் சொன்னாருன்னு சமாதானம் வேற!
கேட்டா colic baby depressant ன்னு நல்லாவே இங்கிலிபிஷ்ல பேசறாங்க!

ஆனா நம்மூருல எதப்பா ஊத்தித் தூங்க வைச்சாங்க?
தமிழையும் பாட்டையும் அல்லவா தாலாட்டுப் பாலாடையில் ஊற்றித் தந்தார்கள்!
இந்த மாதிரிப் பாடக் கூட வேணாம், அப்படியே கொஞ்சம் ஹம் பண்ணாலே போதும், கொஞ்சும் பிஞ்சுகள் தூங்கிடாதா என்ன?
நாமும் கூடவே சேர்ந்தே தூங்கிப் போயிடுவோமே!
எங்க....................கூடவே, வாய் விட்டு, பாட்டு படிங்க பார்ப்போம்!


(செல்லமாய்ப் பிறந்தவனோ....)கொல்லையிலே தென்னை வச்சி, குருத்தோலை பெட்டி செஞ்சி
சீனி போட்டு நீ திங்க, செல்லமாய்ப் பிறந்தவனோ!
பட்டெடுத்து தொட்டில் கட்ட, பசும் பொன்னால் பொட்டுரைக்க
ஆட்டிடுங்க தாதியரே - என் அன்னக்கிளி கண்ணயர!


(செட்டியார் வளையல் மாட்ட வராரு...) வாருமய்யா வளையல் செட்டி, வந்திறங்கும் பந்தலிலே!
கோல வளையல் தொடும், குணத்துக்கொரு வளையல் தொடும்!
நீல வளையல் தொடும், நிறத்துக்கொரு பச்சை தொடும்!
அள்ளிப் பணம் கொடுத்து, அனுப்பி வைப்பார் உங்களப்பா!

-----------------------------------------------------------------------------


(பெருமாளு தான், காப்பு இருக்க வேணும்) கல்லெடுத்து கனி சொறிஞ்சு, கம்சனையே மார் வகுத்து
ஓலம் செய்யும் மாயனவன், ஒலகளந்த பெருமாளோ!
பச்சை முடி மன்னவரோ? பவழ முடி இராவணனின்
அச்ச மெல்லாம் தீர்க்க வந்த ஆதி நாராயணரோ?


(மாமன் கொண்டாந்த சீதனம்...) பால் குடிக்கக் கிண்ணி, பழம் திங்க சேனோடு
நெய் குடிக்கக் கிண்ணி, நிலம் பார்க்கக் கண்ணாடி
கொண்டைக்குக் குப்பி, கொண்டு வந்தார் தாய்மாமன்.
கல்லெடுத்து உங்க மாமன், காளியோட வாதாடி,
வில்லெடுத்து படை திரட்டும் வீமன் மருமகனோ?
-----------------------------------------------------------------------------




(ஓங்க அப்பாருக்கு காஞ்சிபுரத்து எண்ணெய் ஒத்துக்காதாம், மவனே!...)
காஞ்சிவரத் தெண்ணைய், கண்ணே கரிக்குதுன்னு
தெங்காசி எண்ணெய்க்கு, உங்கப்பா சீட்டெழுதி விட்டாக!
வாசலிலே வண்ணமரம், உங்கப்பா வம்சமே இராச குலம்
இராச குலம் பெற்றெடுத்த ரதமணியே கண்ணசரு!


(அட, இப்படியும் பால் காய்ச்சுவாங்களா, என்ன?....பூனை, புலி, ஆனைப் பால்) பூனைப் பால் பீச்சி, புலிப்பாலில் உறையூத்தி
ஆனைப்பால் காயுதில்ல, உங்கப்பா அதிகாரி வாசலிலே!
வெள்ளிமுழுகி என் கண்ணே, உன்னை வெகுநாள் தவசிருந்து
சனிமுழுகி நோம்பு இருந்து, நீ தவம்பெற்று வந்தவனோ!
-----------------------------------------------------------------------------

(கண்ணுறங்கு கண்ணுறங்கு)
கண்ணுறங்கு கண்ணுறங்கு மாயவனே கண்ணுறங்கு

கண்ணுறங்கு கண்ணுறங்கு மகிழம்பூ கண்ணுறங்கு
கண்ணுறங்கு கண்ணுறங்கு கண்மணியே கண்ணுறங்கு
கண்ணுறங்கு கண்ணுறங்கு பொன்மணியே கண்ணுறங்கு



பாட்டுக்கு விளக்கம் வேறு வேணுமா என்ன! :-)
கொல்லையிலே தென்னை வச்சி, குருத்தோலைப் பெட்டி செஞ்சி
- அந்த இண்டு இடுக்குப் பெட்டியில்...
ஆலையில் இருந்து கொட்டிய நாட்டுச் சக்கரை, சீனியைப் போட்டு, தின்று கொண்டே இருக்கலாம்!
- யாராச்சும் நெசமாலுமே குருத்தோலைப் பெட்டி செஞ்சிருக்கீங்களா? :-)

  © Blogger template 'Sunshine' by Ourblogtemplates.com 2008

Back to TOP